Facebook Twitter Google +1     Admin

Se muestran los artículos pertenecientes a Marzo de 2012.

Astra

Venus, Diana, Juppiter nocturnos campos ordine currunt.

01/03/2012 21:56 thersites Enlace permanente. sin tema No hay comentarios. Comentar.

Merlinus

Novi filiae minoris vicini delicati sunt: queruntur quod Merlinus ululat.  (Merlinus est nomen cani minoris filiae.)  Cum aliud non inveniret remedium, hospitem animalis me obtuli.  Nunc ergo sum vir cum cane.

04/03/2012 21:26 thersites Enlace permanente. sin tema Hay 1 comentario.


Ad Alexandram de Merlino

20120306180447-5x13-025.jpg

Si ab initio, cara Alexandra, meus fuisset canis Merlinus, certe Latine latraret vel saltem intellegeret, sicut intellegebat olim Lupa illa callidissima, quam optimam memoria discipulam teneo atque fidelissimam.  Sed Merlinus a Violeta jam doctus est Hispanico sermone.  Doctusne dico?  Immo doctissimus!  Una cum cane suo tradidit mi Violeta tria folia minutissimorum monitorum, quae inter erant (fidemne poteris dare?) sex et viginti jussa, sex et viginti!, ad occasiones diversas pertinentia.  Lupam sex septemve jussa docueram, nisi fallor: 'sede' (et sedebat donec 'surge' audiret), 'veni', 'abi', 'cubitum' (tunc in lectum abibat ibique manebat nisi arcessita fuerit), nonnulla plura.

Ignosce nunc quaeso, cara Alexandra, quod non ultra scribam, in multa namque jussa incumbendum est mihi!

06/03/2012 18:04 thersites Enlace permanente. sin tema No hay comentarios. Comentar.

Sapones

Anna, quae discipula olim fuerat, quoddam insolitum mandat.  Tutrix quorumdam puerorum infirmiore capite, quibuscum sapones fabricat, ex me petit ut novas fingam formas saponibus fabricandis.  Stupeo.  Adjuvare vellem, sed minime vacuus sum hoc tempore.

Sed tamen non omnino recusso.  Domi denuo colloquemur saturni die.

07/03/2012 22:30 thersites Enlace permanente. sin tema No hay comentarios. Comentar.

De sale atque Gadibus

In hoc sonetum Felicis Lope de Vega mane forte incidebam:

   Esparcido el cabello por la espalda
   que fue del sol desprecio y maravilla,
   Silvia cogía por la verde orilla
   del mar de Cádiz conchas en su falda.

   El agua entre el hinojo de esmeralda,
   para que entrase más, su curso humilla;
   tejió de mimbre una alta canastilla
   y púsola en su frente por guirnalda.

   Mas cuando ya desamparó la playa,
   "Mal haya, dijo, el agua, que tan poca
   con su sal me abrasó pies y vestidos".

   Yo estaba cerca y respondí: "Mal haya
   la sal que tiene tu graciosa boca,
   que así tiene abrasados mis sentidos".

Quod ita verto, pace omnium postulata:

   Umeris capillo consparso, qui capillus
   portento soli fuit atque contumeliae,
   in viridi litore maris Gaditani
   conchas in gremio Silvia legebat.

   Aqua, inter fenicula smaragdina, caput
   demittebat, quo penitius adiretur a puella;
   haec viminibus canistrum contexuerat
   et capiti imposuit ad ornandam frontem.

   Sed jam litus deserens ita est loquuta:
   "Male sit aquae, quae tantula sale
   pedes atque vestes sic combussit".

   Cum adessem respondi: "Male sit sali
   qui tuo est ori, puella, venustissimo,
   nam ita meos combussit sensus omnes".

Ignoscat mihi Sandra quod die mulieris hanc qualemcumque sit interpretationem, cum de Gadibus atque de sale ludat, sibi cum salute mittam.

08/03/2012 15:13 thersites Enlace permanente. sin tema Hay 5 comentarios.

Ad Pasqualem de errore lectionis

Non, quod ego maxime mirabar illud est, quod ejus vici nomen, quod indigenarum vocabulo ’Chistén’ est et, ut litteris graecis scribam, ζισ-τέν sonat, idem esset atque illud quod in ore ceterorum Aragonensium (ripas praesertim fluminis Hiberi incolentium) ’Gistain’, etiam ’Gistaín’ perscribitur, et ita sonare solet (litteris denuo graecis adhibitis): χισ-τα-ίν.  Quomodo esse potest?

Explanatio mea, etsi demonstrare nequeam, exstat adhuc mihi quidem sola quae totius rei puncta amplectatur simulque verisimilis videatur.

Demonstrare non possum, sed verbum ’Gistain’ non est nisi illud quod nunc nos, hispanicum sermonem loquentes, scribimus ’Chistén', sed ab aliquo scriptum linguae francogallicae perito.  Illo enim sermone, ’Gistain’ ζιστέν sonat.

Esse potest ’Gistain’ scriptura francogallica?  Certe potest; Pyrenaeos nostros montes non initio percurrerunt, amore dico cognoscendi, caesaraugustani nec matritenses, sed homines ultra montes nati sicut, exempli gratia, Lucien Briet ille cujus photogrammata tam tibi sunt cara.

Potestne fieri ut nihil chartae nostrae geographicae aliud initio fuerint nisi francogallicas prave imitatae?  Ita mihi quidem videtur, sicut tot fabulae russicae quae lectae a nobis fuerunt non ex russico, sed ex francogallico sermone sunt interpretatae, vel, ne longius abeam, dictionnarium hodie usitatissimum inter pueros hispanicos nihil est nisi mediocris epitome illius Felicis Gaffiot.

Ceterum, quod fieri possit ut nomen geographicum aliquod in usum veniat ipsorum popularium non ex ore loquentium, sed ex lectione (etsi prava) chartae cujusdam geographicae, satis, ut opinor, mane demonstratum est.

09/03/2012 17:56 thersites Enlace permanente. sin tema Hay 1 comentario.

Polonus

Longam tero horam blogi lectione Kerauni (qui notulam hic jam mense januario scripserat, sed non ego legeram).  Paulo plus de eo deque urbe ejus disco, et de somniis, et de versibus.  Sagire conor officium studiumque proprium, sed jam vesperascit, et Merlinus ceteraque avocant me a divinatione.

Quam devertimur reti!

10/03/2012 18:55 thersites Enlace permanente. sin tema Hay 1 comentario.

Neorrabioso

Novum reti piscem sectatus sum, lucidum et suculentum, qui se poetam appellat et multum legit atque scribit non sine lepore, imprimis de patre, de puella, de patria vel, ut melius dicam, contra patrias.  Ceteras appellationes (vasconicas, hispanicas) recusans, nomen sibi indidit Bataniae, ipse sibi patria esse ratus.  Legite.

12/03/2012 17:46 thersites Enlace permanente. sin tema No hay comentarios. Comentar.

Nulla dies sine linea

20120313222853-12iii3-043.jpg

Age, lineam jam scripsimus.

Etiam photogrammata addamus; sic oculi contenti erunt.

Solarium hoc in aedibus Pitarque, in vico Turolensi, invenimus.

13/03/2012 22:28 thersites Enlace permanente. sin tema No hay comentarios. Comentar.

Callidus canis

Officium canis educendi retributione non caret.  Placet homini vergenti aetate, inter alia, juniorem contemplari feram per campos discurrentem.  Multas vias hodie transeo quae mensibus, annis fuerant in oblivione.

Ut pares sint utrique vires, saepe birota utor.  Cum Merlino displiceat a me longe abesse, eum hodie sensi intente me intuentem, qui birota vehebar; egomet attentus eram, paratus compescere rotas cum primum canem necessitas consistere cogeret.  Opus non fuit.  Cum in latus tumuli cuiusdam via pervenisset, satis acclinis hac ex parte, Merlinus repente aliquantum praecurrit ibique, facie apposita tristi canum cacantium, suo functus est officio aspiciens me quasi diceret: "Sursum curre nunc, bipes, culus defricatus erit antequam huc perveneris".

14/03/2012 09:08 thersites Enlace permanente. sin tema No hay comentarios. Comentar.

Quadraginta tantum

Multum risimus sententia illa parietali:

ψηφισε Αλι Μπαμπα, ἐχει μὸνο 40 κλέφτες

quae Latine legi potest:

suffragare Ali Baba, habet tantum quadraginta praedones!

15/03/2012 15:29 thersites Enlace permanente. sin tema Hay 1 comentario.

Ducenti anni

Gadibus ducentis abhinc annis edita est prima constitutio modernae, ut aiunt, aetatis in Hispania.  Nihil nonnullis magis exspectatum: dimidiae hispanorum parti satis fuit ut ei constitutioni faveret altera dimidia pars, vitam ad eam debellandam consecrarunt.  Hi maledicebant, illi canebant ’Viva la Pepa!’ (’la Pepa’ nomen constitutioni indiderunt, quasi ’Josephae’, quia promulgata est die XIX martii mensis, die sancti Josephi).  Qua verborum junctura, ’Viva la Pepa’, aliquid agi temere, aliquem laeta neglegentia sese habere etiam hodie quotidiano sermone significatur.

Haec, quae nunc est constitutio, nobis jam plus quam priores durat.  Vix credi potest, in hac natione, ubi quisque se unicum putat atque maxime alium atque ceteris.  Nonne Batania, bonus ille poeta, se unum nuper nationem praedicavit?  Vestigia sequitur Valle-Inclán, qui Hispanos in duas divisos esse partes aestimaret, se ceterosque omnes.

Quae natio!  Quae capitum durities!  Talibus civibus, cetera egregiis, quamdiu nobis manebit lex?

19/03/2012 21:59 thersites Enlace permanente. sin tema No hay comentarios. Comentar.

Aqua, aqua!

Imber denique postquam nimium diu sicca fuerat terra.  Sed quam male olet Merlinus!  Miser Merline, nihil culpande canis!  At nasus me meus paulum abesse cogit.

21/03/2012 08:58 thersites Enlace permanente. sin tema No hay comentarios. Comentar.

Faustus felixque dies

Cras male erit mihi, praesagio.  Sororis filia ritu nubet marito.  Quod placet, at quales, quam longae erunt caerimoniae!  Totus dies, totus erit deperditus.  Primum sacra quibus minime credo duas horusculas terent, deinde adeundum est ad illas ’bodas de Camacho’ quae semoto patrabuntur deversorio quo laophoris, sicut novus est mos, gregatim vehemur: clausis erit comedendum bibendum saltandum ad multam noctem...

Urbane, vel paene urbanus ibo, sed... omnia poterant fieri sine me.  (Cavetote has querimonias edere foras, quas secreto dico, coram familia beatissimus ego avunculorum!)

Fratrem saltem conveniam qui toto anno afuit.

Duas metuit res mater, quarum altera est cultus cujusdam filii (scilicet ne domum infamet solitis pannis); de prima et capitali suos deprecat deos:  ’Moriar sis deus bone, sed post taedas, ne tristes nuptiae sint nepti, avia defuncta!’.  Risum vix teneo.  Ceterum avia nunc exsultat, cum medicus nescio quibus venenis eam jussisset uti, ad longum tolerandum diem...  Hac tota nocte vigilabit anus, fere nepte beatior.

23/03/2012 18:25 thersites Enlace permanente. sin tema No hay comentarios. Comentar.

Catagraphus

20120325222238-12iii24-079.jpg

Neptis sponsusque sunt maritus et uxor.  Qualis fuit dies nuptialis, serenus, apricus, splendidus, tale utinam sit eis ceterum aevum omne.

Qui enim dies!  Herbae circa cunctae movere incipiebant (nam ’movere’ dicunt aragonenses pro pullulando), cerasi mirabiles eorum roseos flores ostendebant.

Qualis etiam nox!  Venus, Juppiter, Mars...  Mmm, quae tria numina, ad matrimonium augurandum!  Omittamus haec.

Soror minor humerale ostendebat Philippinum, id quod hispanice ’mantón de Manila’ appellatum est, opus egregium et vetustum (cui centum esse anni dicuntur) ab amica commodatum, ita rebus mille portentosis pictum ut longum temporis spatium adhiberetur ad contemplationem.

Ego numquam tale videram, tot animalibus et hominibus in uno agitantibus panno!

25/03/2012 22:22 thersites Enlace permanente. sin tema No hay comentarios. Comentar.

Vita ipsa

Quam ridiculum hoc est, semper incipere atque resumere, Sisyphus quisque suum producens saxum...

27/03/2012 22:53 thersites Enlace permanente. sin tema Hay 2 comentarios.

Tirant lo Blanch

Cum mahometicus rex Canariae Magnae anglicam vel potius cambrensem civitatem Varoic oppugnaret, fortissima comitis uxor, penuriam famemque praecavens ’anà per les cases, fent traure forment et civades’ id est, 'domos perlustrat ad frumentum et avenam comparandum'...

Verbum 'forment' etsi nunquam audieris, facile intelleges ex latino 'frumento' --id quod acciderat mihi.  Sed caesaraugustani millies audieramus nomen sculptoris Damiani Forment, auctoris arae maximae basilicae caesaraugustanae, operis eximii (de 'retablo' vel 'retrotabulo' loquor) atque pulcherrimi.  Repente et vis nominis, et armorum ipsius aperitur (quae arma sunt spicae duae transversae).

Obiter intelliges nomen insulae minimae Balearis: Formentera, id est, Frumentaria.  Et si verum non est...

Sermone valentino adjuvante, duo valentini coeunt egregii, Martorell et Forment.  A, hae sunt parvae philologi voluptates...

Hos dies facinora perlegam Tirantis Candidi equitis valentini...

29/03/2012 16:16 thersites Enlace permanente. sin tema No hay comentarios. Comentar.

Orbis novus

Spatiamur Merlinus egoque.  Sol, jam jam trans montes se condens, e cerasorum floribus ultimos exprimit roseos fulgores.

Obvii tres pueri adeunt.  Iis quoque canis comitatur, eorum autem canum quorum mandibula terere valeret robur.  Merlinum jubeo sedere donec viatores transierint.  Sed unum eorum comminus agnosco:

--Pappae!  Salvus sis, amice Stalin!

--Salve --respondet gradum comprimens.

o o o

Hodie mane primum convenimus: Stalin studet cursui primo secundariae, quem gregem curabam absente professore.  Nomen pueri me percussit statim auditum.  Sed, quantum vidi, homo est tranquillus atque affabilis.

Collega quaedam, quae saepe pueros secundariae docuit, certiorem me fecit:

--Non est primus eo praenomine in lyceo.  Fuit jam aliquot annis quidam Stalin Josephus (utrumque praenomen est), cui fuerat frater Darwin Bartholomaeus sororque Usnavy Myriam.

--Usnavy!

--Quid stupes?  Discipula est mihi Ginsop appellata.

--Ginsop?  Id praenominis quid sibi vult?

--Si recte habet profestrix anglicae linguae, etymon nominis est ’jeans shop’.

o o o

--Hic sumus --facit Stalin--, paulum spatiantes.

--Quod optimum mihi videtur.  Fac valeas, amice Stalin, et habeas felices ferias.

Ferias Stalini augurari, id nunquam fieri posse credissem.

30/03/2012 21:40 thersites Enlace permanente. sin tema No hay comentarios. Comentar.


Blog creado con Blogia. Esta web utiliza cookies para adaptarse a tus preferencias y analítica web.
Blogia apoya a la Fundación Josep Carreras.

Contrato Coloriuris