Prima nix

Post aliquot obscuros dies, quibus imbres mediocres vallem hanc umectarunt, en primus dies serenus.  Mons Cajus suum vetus caput prima nive monstrat consparsum, non tantum autem ut titulum canitiei quo donatus est a Valerio Martiale plene mereatur.  Exspectandi sunt ergo hiberni dies.  Sed primum gelu hac nocte jam fere sentiebamus.

Cavum viden quod laevam tenet culminis?  'Puteus Sancti Michaelis' vulgo appellatur, et antiqui est glaciaris reliquiae.  Ibi, quoad huius regionis senes narrare soliti sunt, perpetua nix manebat, etsi macula foret candida imo in puteo, etiam sub aestu caniculae.

Sed quam pulcher dies!