Timor

Mense maio praeterito matris valetudo periclitavit.  Nullus erat mortalis morbus, sed magnis afficiebatur doloribus.  Quod diu timueramus accidebat; sed nobis minus grave praesentibus (ut solet) quam metuentibus.  Quid nunc agere, nisi adesse, comitari?

Sed paulatim clinicam tandem reliquit, domum revertitur: at quam mutata!  Quamquam amotis doloribus subtristis, dolores rursus regredi non desierat pertimescere et abominari.  Nihil velle, deprecari vitam.  Primo ad nuntium meum (per uasap vel whatsapp) non respondebat.  Nunc demum nonagesimo anno concidere videbatur.

At julio jam vergenti, nescio cur, nescio quo pacto, timorem eicere videtur; nunc pectinari, oculos depingere, mundum denique muliebrem recuperat.  Aliquanto debilior, sed denuo caput tollere, surridere.  Et rursus ea scit una quid quomodo quando est agendum unicuique liberum, nepotum, necessarium.

Rursus ea viva flamma, quam extingui, pro dolor, aspiciendumst!

3 comentarios

[Thersites - 09 de agosto de 2017 - 12:42]

Heri viii augusti mater nonagesimum et alterum complevit annum. Et whatsapp et facebook et skipe vulgo utitur. Multa legit (librum unum vel duos in mensula habet cum singulis indicibus). Quamlibet putabam esse nobis e grege matrum, sed unam nunc video talem e lvii in gerontocomio (ubi ipsa voluit ceteram degere vitam). Liberi --eius opus-- tumescimus quasi auctores.

[Sandra - 06 de agosto de 2017 - 02:09]

Congaudeo tibi, care Thersite, quod timore pulso mater in dies magis convalescit. Matri meae semper telephonice colloqui displicuerat, sed postquam ei tres abhinc annos septuagesimum annum agenti telephonum novissimum gestabile donum dedimus, nunc tantum nuntiolos per whatsapp sermones serere vult et imagines de se ipsa speciosa mittit repuellascens.

[Nemo Oudeis - 06 de agosto de 2017 - 00:34]

Summopere miror matrem tuam ad nonagesimum annum provectam posse nuntiolos per whatsapp accipere atque iis respondere. Mater enim mea, longe junior, nescit etiam telephono gestabili uti.