Grippe A

Morbo domi teneor blando lenique per totam hebdomadem.  Solis enim die febrem passus sum cum artuum doloribus, symptomata ejus morbi quem influentiam vocant vel grippe.  Lunae die, cum febris maneret, medicum telephonio arcesso.  ’Num urget valetudo?’, quaerit mulier.  ’Non admodum’, fateor.  ’Cras igitur doctor te viset, nam hodie non vacat.’  Cum ergo martis die medicus domum advenit, febris me dormire noctu siverat, nec mane redierat.  Nihilominus amicus Joachinus pectus auscultat, guttur examinat lingua cochleare depressa, symptomatum narrationem audit.  ’Grippe A cepisti, amice!’, ridens dicit.  ’Serione dicis?’  ’Serio dico.  Sed quiesce atque sanabis.’  ’Sed nullam jam febrem patior!  Cras in lyceum eram iturus!’  ’Minime.  Manendum est tibi domi quieto per septem dies!’

Ecce me domi quietus.  Nec febris regressa est, nec ullum dolorem patior.  Sed in tanto pavore ille morbus est, ut imprimis caveatur contagio, nec ipse ausus sim jussa spernere medica, non quia mihi timeam, sed dicta metuo eorum quibus summum est numen Securitas.

Sed forte libris non careo.  Unum lego cujusdam Kagan, historici, de bello Peloponnesiaco, interdum cum altero commutans: memoriae Mario Onaindia c.t. ’Pretium libertatis’.  Plura forsan alio scribam die de his libris.  Valete.

4 comentarios

[Thersites - 27 de noviembre de 2009 - 23:29]

Gratias ago vobis maximas, amici. Num verbum 'Real' ut hispanicum intelligere debemus?

[JLCG - 23 de noviembre de 2009 - 02:21]

Est in USA agmen pedilusorium c/n Real Salt Lake City.

[Ludovicus - 21 de noviembre de 2009 - 20:29]

Fac ut valeas, frater carissime!

[Jaume - 21 de noviembre de 2009 - 10:42]

Saltem te aegrum esse beneficium menti tuae capit ob libros magno opere legendos.
Volo autem te quamprimum valere!

Jaume