Thersites

Dies atri. Non, id nimium est. Dies cinerei, aliquanto fusci.

Homines non sunt mali. Utinam forent! Utinam, dico (seu potius Plato dixit, sed locum quaerere omitto), utinam mali forent, id est, malum sibi ratione et conscientia selegissent! Spes tum esset ratione et argumentis eos suadendi bonum. Sed homines mali non sunt. Vita iis est plerumque dura, tristis, miseranda. Quibus filii sunt e pueritia exeuntes difficiliora adveniunt nonnulla. Luctantur, operantur, temptant. Luctamur, insudamus, adnitimur.

Mutavi consilium. Platonem translego locum quaerens, sed frustra. Quis vestrum, lectrices vel lectores doctissimi, scit ubi locorum pronuntiaverit Socrates illud percelebre utinam?

In diebus obscuris, nihil melius quam luminis memoria. En dies qui splenduit nobis in Palearibus (vel Pajares), in saltu qui aditus est ad asturicas valles. En valles ipsae montesque astures, caerulei sinceritate et distantia!